/aysor.am/ Հայաստանում ցածր լարման ցանցերում էլ.էներգիայի ավտոմատացված հաշվառման համակարգերը կիրառվում են 2007 թ. փետրվար ամսից: Այս տարվա հոկտեմբերի 1-ի դրությամբ ավտոմատացված հաշվառման համակարգերում ընդգրկված են 6443 0,4 կՎ բաժանորդների հաշվիչներ Երևանում, Ծաղկաձորում, Արարատի, Արմավիրի և Սյունիքի մարզերում:
Ինչպես Aysor-ին հայտնեց «Հայաստանի էլեկտրական ցանցեր» ՓԲԸ իրացման փոխտնօրեն Արսեն Գաբրիելյանը, ցածր լարման ցանցերում էլ.էներգիայի ավտոմատացված հաշվառման համակարգերի կիրառումը հանգեցնում է մի շարք առավելությունների` ցանցի տեխնիկական վերազինում, ինֆորմացիայի հավաքագրման արդիականացում, հավաքագրման պրոցեսում մարդկային գործոնի զգալի պակասեցում, ինֆորմացիայի հավաքագրման ոլորտում սպասարկող անձնակազմի կրճատում, էլ. էներգիայի կորուստի նվազեցում: Ըստ նրա, որոշ տարածքներում արձանագրվել է կորստի կտրուկ նվազեցում` մինչև 5℅, նախկին 20℅-ի փոխարեն:
ԷՀՀԱ համակարգը կիրառվում է 220կՎ, 110կՎ, 35կՎ ցանցերում, բոլոր կայաններում և ենթակայաններում անկախ տարածքային պատկանելությունից: Հետազոտությունների և հատուկ ծրագրի միջոցով ընտրվում են համեմատաբար ավելի մեծ կորուստ և անբավարար տեխնիկական վիճակ ունեցող տարածքները (ենթակայանները), որտեղ ավտոմատացված հաշվառման համակարգի ներդրումը կբերի առավել մեծ արդյունավետության: Տարածքների ընտրման հարցում ընկերությունը շեշտը դնում է համեմատաբար ավելի վատ տեխնիկական վիճակ, այդ թվում անբավարար հաշվառման սարքեր ունեցող տարածքների վրա, քանի որ ավտոմատացված հաշվառման համակարգերի կիրառումը հանգեցնում է «ինչպես հաշվառման, այնպես էլ ցանցի տեխնիկական վիճակի բարելավմանը»: Ներկայիս դրությամբ ավտոմատացված հաշվառման համակարգեր գործում են Երևանի Նորքի 6-րդ զանգվածում, Էրեբունի համայնքում, Հարավ-արևմտյան թաղամասում, ինչպես նաև Արարատի, Սյունիքի և Կոտայքի մարզերում:
Ա. Գաբրիելյանը նշեց, որ բնակչության առևտրային հաշվառքի սարքերը (նաև բազմասակագնային հաշվիչները) ձեռք է բերում և տեղադրում մատակարարը` սպառողի պահանջով, կանխավճարի վճարման պայմանով (օրինակ, միֆազ ինդուկցիոն հաշվիչների դեպքում` 10000 դրամ):
Ա. Գաբրիելյանը հայտնեց, որ նախատեսվում է ԷՀՀԱ համակարգը ներդնել նաև 10(6) կՎ ցանցերում:
«Առհասարակ այս ոլորտը զարգացած երկրներում ունի զարգացման լուրջ հեռանկարներ: «ՀԷՑ» ՓԲԸ մտադիր է ցածր լարման ցանցերում էլ.էներգիայի ավտոմատացված հաշվառման համակարգերի մեջ ներառել հանրապետության ողջ տարածքը, ինչի համար, բնականաբար, կպահանջվեն լուրջ ներդրումներ»,- նշեց փոխտնօրենը: