Մարտի 17-ին Մոսկվայի և Համայն Ռուսիո Կիրիլ Ա պատրիարքը և Գարեգին Բ Ամենայն հայոց կաթողիկոսը այցելեցին Քանաքեռի Սուրբ Աստվածածին ռուսական եկեղեցին։
Սուրբ Աստվածածին ռուսական եկեղեցու վերականգնման գործում մեծ ներդրում ունեցած մի քանի բարեգործներ պարգևատրվեցին Ռուսական եկեղեցու առաջնորդի կողմից։ «Հայաստանի էլեկտրական ցանցեր» ՓԲԸ գլխավոր տնօրեն Եվգենի Գլադունչիկը պարգևատրվեց Սրբազան Սերաֆիմ Սարովսկու երրորդ աստիճանի շքանշանով։
ՌԴ գլխավոր հյուպատոս Վլադիմիր Խրուլևը և Գյումրու քաղաքապետ Վարդան Ղուկասյանը պարգևատրվեցին մեդալներով։
Դեռ 2001 թ. Ռուս ուղափառ եկեղեցու երևանյան համայնքը ի դեմս Վլադիմիր ավագ քահանա Գլազաչևի հանդես էր եկել Սուրբ Աստվածածին ռուսական եկեղեցու տարածքում հուշաքար-խաչի կառուցման նախաձեռնությամբ: Նախագծի գլխավոր հովանավոր դարձավ «Հայաստանի էլեկտրական ցանցեր» ընկերությունը ի դեմս գլխավոր տնօրեն Եվգենի Գլադունչիկի: Շնորհիվ նրա ջանքերի կառուցվեց հուշաքար-խաչը և բարեկարգվեց եկեղեցու ողջ տարածքը: Խաչը կանգնեցնելուց հետո Եվ. Գլադունչիկի նախաձեռնությամբ սկսվեցին եկեղեցու զանգակատան վերականգնման աշխատանքները: 2001 թ. աշնանը այն օծվեց Բելգորոդի և Ստարի Օսկոլի Հովհան արքեպիսկոպոսի կողմից: Վերանորոգման, շինարարական և գեղարվեստական աշխատանքները շարունակվում են առ այսօր:
